Søndag 1. mai 1932 vart Volda kyrkje vigsla av biskop Andreas Fleischer. 2000 fekk plass inne i kyrkja til festgudstenesta kl. 11. Endå fleire var samla utanfor og kunne høyre lyden frå høgtalarar på kyrkjebakken og ved Uppheim. Gudstenesta vart overført i radioen til heile landet. Seinare på dagen var det festkonsert og kveldsgudsteneste i den nyvigde kyrkja. Søndag 1. mai 2022 er du invitert til ny festgudsteneste og ny festkonsert for å feire kyrkja sitt 90-årsjubileum!

Klokka 11 feirar vi festgudsteneste med dåp og nattverd. Volda kyrkjekor syng, ordføraren og mange andre frivillige medverkar, og alle prestane i Volda er med saman med prost Ingeborg Matre. Etter gudstenesta er det kyrkjekaffi for heile familien i Uppheimsparken. Det vert kaker, helsingar, vi fyrer opp bålpannene og vi har aktivitetsløype for borna. 

Klokka 19 opnar kyrkjedørene igjen for festkonsert. Inngangsbilletten er på 300 kroner. Konserten er finalen for kyrkjemusikkveka.  På programmet står kjende verk som Sivert H. Geitvik sin korsats «Himmelske Fader» og Magnar Åm sitt arrangement av «Ned i vester soli glader». I høve dette jubileet har kantor Bert Handrick skrive ein intrada og koral i gammal stil over «Lovsyng vår Herre» for 3 trompet, pauke og kor som skal urframførast denne kvelden. Og så blir det eit gjensyn med pianisten Olav Egge Brandal som skal akkompagnere Volda kyrkjekor. Mange aktørar med viktige roller i Volda kyrkje si musikalske historie er med:

Volda kyrkjekor (dir. Bert Handrick)

Volda Vokal (dir. Magnar Åm)

Volda mannskor (dir. Nina Vedeld Telseth)

Volda blandakor (dir. Øyvind Lied)

Volda hornmusikk (dir. Ulf Kristiansen)

Leif-Atle Strand - trompet

Per Gunnar Flø - trompet

Arild Andenes - trompet

Alexander Minkov - pauke

Olav Egge Brandal - piano

Øyvind Robak - fiolin

Vel møtt til jubileumsfeiring!